05 Dec 2013

الريادية ايه حمدي, طريقة لحساب عمرك

 

طريقة لحساب عمرك..

إسمى ايه..ماشية فى ال24 سنة..عايشة بقالى سنتين..ياتري انت بقالك كام سنة عايش؟

 كان اكبر انجاز في حياتى من فترة انى دخلت هندسة بس حلوان..و حلوان ماكنتش هدفى في ثانوى..بس ربنا كاتبها كده..و قولت كفاية انى حققت هدفى ووصلت لهندسة..مرت اول 3 سنين بملل وكره شديد للكلية..

وحالة التوهان وده طبيعى لانك مش عارف بعد ما وصلت لهدفك,,المفروض تعمل إيه؟؟

 

وبالصدفة حضرت ندوة لدكتور ابراهيم الفقى في صيدلة القاهرة؟! بامل داخلى انى اتغير من كلامه لانى بجد تعبت.!..وبجد خرجت انسانة تانية ..عرفت شئ اسمه..النجاح  فى الحياة..طيب ما انا عايشة عايشة.. طيب ما أعشها اجمل حياة..فين الناس من حياتى.؟!

 كلام كتير قالوه فهمتوه بعدها..منها ادور على الايجابي  دائماً في الامورً…

 و دى كانت اهم اعتقاد اتزرع جوايا..

 فقررت اخد سكة لوحدى!..اي تغير هدخله حياتى اكيد فيه شئ ايجابي..

 واتنبهت لفكرة انك تمارس حاجة بجانب الدراسة.. كان اول اكتيفتى في الكلية و بقاله 3 سنين..اكتر ناس مختلفة شكلا وهدفا عن الناس اللي تعرفها في الكلية.. ليه و ازى؟!

إسمهم ..”دايمنشنز“..طيب قصدهم إيه بيها بردو؟!..وعرفت تفسيرها بعد كده..؟

فقررت اخوض التجربة,, بدل قفول العقل والحياة اللي حاسه!

 

 وبالفعل قدمت و روحت اول انترفيو في حياتى..توتر و مغامرة عجبانى!

 عندى خلفية بسيطة عن تجربته..خبرتى بالعمل الجماعى قليلة اوى.

 بس عديته بانى كنت هادية و على طبيعتى لانها هتبان في الشغل.

 وبالتالى اللي اعرفه وفي شخصيتى ..اجاوب عنه بذكاء.واللى ماعرفوش او مش فيا.

 بقول الحقيقة..وده احسن اسلوب نجح معايا في التجربة دى بعد كده.

 و كم انا شاكرة للانسانة اللي قبلتنى..ال  بي ار هيد..اتغيرت بيها حياتى ..

 وللعلم كانت اصغر منى سناً..وده انا فرحانة بيه ليها.

  اول انترفيو,,اول نشاط  ادخله,, و اول عمل جماعى.

  تحدى كبير..بس مش خايفة..^_^ كله ايجابي ^_^..

اتعرفت على شباب مختلف..عندهم حب للزمايلنا وانهم يفيدوهم باي شكل..نساعدهم و    يساعدونا بتغير انفسنا بيهم..

 

كان اكبر تحدى ليا ..احتمالية تعاملى مع ناس شخصيتها مجهولة ليا..

تدركتها بالاحترام..و بالمعاملة الطيبة..ومراعاة عدم حدوث  قلق في وجودى او إحتكاك مع حد..علشان ده هيفيدنى نفسيا في الشغل..فمكسبتهم علمتنى منهم وعرفتنى نفسي من جديد.

عاملت الهيد بتاعتى كويس اوى لانها بفضلها ماكونتش هكون معاهم..شجعتنى اوى واحترمتنى جدا و احترمت امكانياتى البسيطة و معرفتى المحدودة في بداية الشغل.. فكل معلومة عندها كانت بتعرفنى بيها…فده زودنى واتعلمت منها واتحسنت و اتغير تفكيري جدا..

احيانا كنت في مواقف لازم اتعامل معاها صح او استحملها و يتعلى مصلحة التيم على اي شئ او شغل في وقت قرب الامتحانات..او انك تمثل التيم مع حد سواء جوه الكلية او خارجها..او انك تزيد معرفتك بمجالات غير مجال دراستك..

و نفعنى انى كنت مقررة انى اكون هادية ومرنة وجادة من بداية دخولى معاهم…الاحساس بالمسؤلية تجاهم وتجاه الناس اللي انت بتساعدهم.. لو اتمسكت بالفكرة دى..هتتغير نظرتك للامور و اهمية دورك..و هتعدي المواقف دى..و بالفعل ده اللي عملته انا..

 

اما اخطر تحدى اكتشفت انى اتحطيت فيه..هو حكم صحابى عليا بعد ما دخلته؟!..خاصة من الناس اللي بتشوف ده تضيع وقت و…… كتير

بس ايمانى انى عملت تغير ايجابي في شخصيتى..جعلنى واثقة انها مجرد اعتقدات لازم تتمحى بتنوير عقولهم  للفوائد اللى إكتسبتها..وانها معتمدة على الشخص نفسه..

وبالصدفة الفترة اللي بعدها قالولى 5 من اصحابي ..انهم دخلو انشطة كتير..و قالولى انهم إتغيرو أوى..وبقى ليهم هدف..حتى لو صغير بس عندهم شئ..انا حست بوجدهم انى موجودة في كل الانشطة اللي دخلوها ..تخيل كمية الخير اللي كسبته..من لحظتها بجد انا حسبت عمري من جديد… بعدها قررت انى اسيب اثر ايجابي بوجودى في حياة اى انسان.

تخيل لو كل مشترك في اي نشاط,,حس و قدر قيمة دوره و قدم تعبه و مجهوده بكل حب و امتنان للناس..لو وضع نفسه مكانهم..اي معاملة و اي صورة يحب يظهرها..واي تغير يحب يضيفوه ليهم؟..واي اختلاف يحب يزوده بالنشاط ده.. في كليته او ايا كان المكان؟

 لو كل قائد احترم وقدر إمكانيات الفريق اللي معاه..

 لان وجود هيد عارف بالظبط  الإمكانيات اللي هتحقق شغله ونوعيه التدريبات اللى محتاجها من البداية للفريق..هيوفر تعب كبير في معرفة كل انواع الشغل  تقريبا اللي هيمرو بيها..

 لو احسن التصرف في الوقت الصعب او في التقصير,وفرق مابين عن القصد او عن غير قصد..و عاملهم بالمساوة و التقدير الانسانى ليهم فعلا أو قولِاً..ده يزود من انتماء وحب الشخص للنشاط..لان التعامل القائد معنويا بيكون اكثر اهمية عن اي شئ تانى..

و لو هما  قدرو صورته والحمل اللي عليه و ثقته فيهم..حتى لو امكانياتهم اقل من الشغل..هيحاولوا لاقصى ما عندهم..

لو أن رئيس النشاط هادئ ومتعاون و محايد قراره مش متاثر بشئ غير المصلحة..و معنويا قريب من كل الفريق..مش واخد مكانة اعلى او فيه حاجز مابينه ومابين الباقي..

لو دايما جدد الثقة فيهم..وحس بجهدهم..و إن من غير اي واحد فيهم هينقص الفريق كله..و قدر انه بياثر فيهم بكل تصرفاته..فممكن يصنع قادة من بعده و يعيد اكتشافهم  لنفسهم.. وممكن يدمرهم,,و يدمروا هما من بعده كتير..

ولو كان عنده من الخطة البديلة لاى حدث مؤثر يحصل في اي ايفنت للنشاط..

و لو كل عضو كان ممثل جيد  للنشاط  في كل وقت ومكان..هياثر في الناس الاخري ويجعلهم يحبو ويحترمو النشاط بتاعه..لانه بيه ومن غيره بيعاملهم  كويس..مش عشان هدف نشاطه بس,بيكون معاهم كويس..

وايضا من اهم الامور مراعاة السرية عن كل شئ داخلى خارج كيان النشاط  لاي حد كان..لتفادى اي ضغط او عدم توفيق او تغير نظرة الاخرين للنشاط  بدون حق او دليل و عدم تضيع المجهود هباء.
ولو كل واحد فيهم كان عنده معرفة بمجال معين..مثال..بالادراة..بالتسويق..بادارة الوقت.

ب مهارات الاتصال..وغيرها كتير..يحاول ينشر المعرفة دى في الفريق نفسه في اجتماع مع كل المشتركين في النشاط و فى تصرفاته..

و لو كل واحد  قدر ظروف غيره..و اختلاف شخصايتهم..

 وكان تعاملهم بعقل وهدوء و احترام و صبر واجتهاد واحترافية وثقة…هيعدو مواقف كتير هما اكبر منها..

من وجه نظري يكون فريق مثالى داخليا..لو اترعى فيه على الاقل بعض الامور دى او اكتر منها اكيد.. و مثل هذة الامور بتاثر ايجابيا في الشخصية على المدى الطويل و خاصة في الشغل بره بعد التخرج..
لان من اكتر التحديات اللي هتنجح اى فريق ..هو اسلوب التعامل و الاحترافية اللي هيتميزو بيها مع بعض..بالاضافة الي قرب الفريق من الناس اللي بيقدملها الخدمة..و تاثره برائيهم في خدمته و دائما يكون على دراية باللي محتاجينه و علاقاته مع الشركات تتحسن وتدخلها افكار جديدة  و وسائل الاعلام و افكار التسويقية الجديدة ليه و خدمته تتميز وتختلف دائما بمعنى يغير جلده كل فترة ..يضيف جديد ويعدل القديم..وغيرها كتير تحديات بتتقابل.

 

من التجربة دى اتعلمت..إنى هحاول دايما اقدم مساعدة في مستقبل وحياة الاخرين..انا عرفت هما فين من حياتى..وانى كل ساعة بسال نفسي..ضيعت الساعة اللي قبلها ازاي؟..بقيت بهتم اتقدم كل يوم..حتى خطوة.. اتعلمت احاول اخطط ليوم او اسبوع على الاقل..بس الاهم مايضعش منى زي ال3 سنين..وانى كل فترة ادخل تغير لحياتى..عشان الملل اخطر شئ في الحياة..بقيت بشترك و انشر كل فرصة اعرفها في اي نشاط او ايفنت او جمعية خيرية..
وان كل فرصة بتجيى مهما كانت صغيرة  لو استفدت بيها هتزودنى بالمعرفة اللي هتأهلنى لفرصة بعدها احسن منها..

اتعلمت التعامل بيكون ازاي في العمل الجماعى..وان مهما حصل احاول دائما على قد ما اقدر تكون عنهم صورة حلوة امام الغريب..و انى اقدر دور اي نشاط تانى بيقدم خدمة للناس..و احاول اساعدهم او على الاقل احضرلهم ايفنت استفيد بيه و اخد ليهم  فيدباك تفيدهم..و بقيت بفكر في اى موقف او مشكلة بشكل ايجابي اكتر..بركز على الحل اكتر من النقد واللوم..وماتاثرش بكلام حد..وانى احاول اتعلم من اى حد ليه خبرة عنى في اي شئ بعمله..و تيقنت أن معاملة الناس بحب و الاحساس بيهم هى المفتاح لاى راحة في الحياة..

 “حياتك مش لوحدك تعيشها“..فين دورك تجاه الانسانية..لازم  تسيب بصمة..مش تجى الدنيا وتمشى ولا كانك جيت..ولا ليك حد يفتكرك بتغير جميل في حياته.. اجمل عمل..هو خدمه الناس.. .حتى لو كان عمل بسيط..بكلمة تشجيع..بفرصة تقولها لحد…ب عمل خيري هتشترك فيه.. تقول لصاحبك..بكتاب غير حياتك..تديه لغيرك..حتى ب نوت بوك تجبها وتكتب فيها كلام تشجيع لحد تعرفه وتديهالوه.. اصحابك اللي نفسيا محبطين وسالبين إديهم امل وحلم من احلامك..داور معاهم عن احلامهم وامكانيتهم هيقدرو يحسنوها..

و ممكن تقدم خير لحد وهو مايحسش ..او مافيش شكر منه.. المايسترو دائما ظهره للجمهور..ماتزعلش من تجاهل او انكار او اي شئ..بس كفاية انك بتقدمها لربنا..

هو هيكون مبسوط بيك اكتر منك و من الاخرين..انت اثبت لنفسك ان ربنا خلقك لسبب جميل..
عشان تعمرها..و تسعد وتساعد غيرك..قدر قيمتك..بجد مش صعبة..وفي كل وقت تقدر..

و تذكر دائماً..انت النحات لنفساك والحجر في نفس الوقت..