05 Dec 2013

الريادية نسمة راجح

 

اسمى نسمه محمد راجح , فى 3 صيدله مصر الدوليه , بحب القراءه جدا وكمان بحب اكتب كل حاجه بتيجى فى بالى .
كنت عايزه ادخل كلية طب لكن بعد ما دخلت صيدله قلت الحمد لله انى مدخلتش طب .
حلمى انى اقوم بتاسيس اول شركة ادويه فى مصر فيها ابحاث واكتشاف للادويه .

اول ما دخلت الجامعه لقيت انشطه كتيير ممكن اشترك فيها وقررت انى اخد خطوه واشترك على عكس كتير من اصحابى اللى قرروا ان سنه اولى للمذاكره فقط.واكتشفت ان فيه مقابله عشان يقبلونى.
فى اول نشاطين قدمت فيهم بعد المقابله لم اقبل لكن بعد كده قدمت فى مؤتمر طلابى فى عين شمس لطلبة الصيدله واتقبلت .
ثم اشتركت فى نشاط للبورصه عندنا فى الجامعه وكانت الحاجه الصعبه اللى بتقابلنى انى ازاى اتعامل مع الناس المختلفه لكن بعد كده قدرت اتكيف واتعرف على ناس اكتر.
اما فى سنه تانيه اشتركن فى نشاطين مختلفين فى الجامعه وكان دايما الحاجه اللى بتحيرنى ازاى نقدر تجمع افراد الفريق حواليك وتقنعهم بفكره معينه وتخليهم يشتغلوا فيها وهم مقتنعين .

انا هتكلم عن القياده وازاى كنت بشوف قائد الفريق مهم جدا , رغم انى مكنتش قائده فى اى نشاط لكن اتعملت مع كذا قائد مع اختلاف اساليبهم وطرقهم .
فيه منهم اللى اثر فيا واتعلمت منه وفيه اللى كان هو بيتعلم من افراد الفريق ودى طبعا مش حاجه سيئه .
فى رايي , القائد مش لازم يكون هو اللى عارف كل حاجه ويقدر يعمل اى حاجه لكن هو اللى يقدر مع افراد فريقه يحققه هدفهم مع بعض وانه يقدر يطلع منهم قدراتهم اللى مستخبيه ومستنيه حد يطلعها.

عايزه اتعلم ازاى اقدر اؤثر بالايجاب على الناس اللى حواليا خاصة لو بقيت قائدة فريق .
كمان فى بعض النشطه بتمنى انها تكون دوليه ولا تقتصر على طلاب مصر فقط.