05 Dec 2013

الريادية هاجر حمدي

My Blog””

–          أنا أسمى هاجر حمدى , من محافظة الجيزة , طالبة فى سنة تالتة كلية حاسبات ومعلومات جامعة حلوان , أحب أقولكو انى مكنتش عايزة ادخلها وكنت عايزة ادخل الكلية الى الكتير بيحلم بيها “هندسة” مش لأنى فعلاً عايزاها بس لأن كنت فاكره ان هى أحلى حاجة ومع العلم كمان انى مكنش ليا علاقة مع الجهاز العجيب دا الى أسمه “كمبيوتر” وربنا قدر ودخلتها قولت لازم أحبب نفسى فيها دا مع التريقه الى بتاخدها من البيت لما الجهاز يبوظ ودا بالأضافة ان الكلية مكانتش مشهورة كانوا بيقولولنا أنتو هتتخرجو تفتحو سيبر !! 😀

–          وجت سنة أولى وهنا بعتبر نفسى من المحظوظين وان ربنا وقف معايا , أول ما دخلت سمعت عن طلاب بيقولو على نفسهم انهم  MSP وأنهم تابعين لشركة Microsoft وفى نفس الوقت سمعت عن نشاط فى الكلية أسمه IEEE  بدأت أتابع كل حاجة بيعملوها وأى ايفنت يعملوه فى الكلية بقيت أحضره عجبنى شغلهم قولت أول ما يطلبوا ان حد يقدم معاهم فى أى حاجة لازم ارشق معاهم على طول , لاقيت ميكرسوفت طالبين طلاب لبرنامج أسمه ICU “imagine cup university  ” من غير ما أعرف هى عن أيه رحت مقدمة بسرعة ودا كان فى نهاية الترم الأول وهنا بدأت أول تجربة انترفيوهات وحاجات عجيبة وحصلت المعجزة وأتقبلت الحمد لله ^_^

–          أكلمكم عن برنامج الــ ICU  علشان لو هيفيد حد , البرنامج دا كان أول مرة شركة ميكرسوفت تعمله وكانت بتستهدف بيه طلبة سنة أولى وتانية ومدته سنتين المفروض انك لما تخلص السنتين دول تكون قادر على أنك تدخل مسابقة Imagine Cup  وهى مسابقة عالمية لازم يكون عندك فكرة تفيد المجتمع ويطبقها على شكل device , software , انتا فى السنتين دول بيدوك كل الى بتحتاجة technical , nontechnical  وفعلاً أستفدت منه كتير جداً .

–          هوووووووووب جت سنة تانية  وقلت لازم أدخل بقى IEEE   وهو نشاط تطوعى بس فى مجالنا بيحاول يقلل الفجوة الى بين الطالب فى الكلية وسوق العمل بره أتعملت فيها أزاى أشتغل مع تيم كبير ونطلع أحلى شغل عرفت أهمية الــ Team work  بجد , وأزاى تكون أنتا وناس كتير قلبكو وروحكو تكون على حاجة واحدة وهدفكو واحد وهو أنكو تفيدو الناس ودلوقت IEEE  فى طريق الأحتراف وان شاء الله فى السما دايماً .

–          #عن مشاكل قابلتنى وأنا فى التدريب , أول حاجة كانت انى كنت مش جريئة انى أقوم أعمل presentation قدام أى حد ودى كان حلها انى المفروض تعود نفسك فى الأول ممكن تعمل قدام المرايه بعدين تطلع قدام أهلك وبعدين قدام صحابك شوية شوية مع التجارب وانك تجمد قلبك هتلاقبك واقف قدام أى حد وبتلعلع 😀 😀  , تانى مشكلة أنى الــ team work  كان بالنسبالى 10% ومكنتش بعرف أشتغل مع حد معرفهوش بس مع التجارب بردو وانك تثق فى نفسك وفى قدراتك هتقدر تشتغل وتبدع مع اى حد J

بشكركم أنكو أستحملتونى وبعتذر انى طولت عليكم ^_^ سلام عليكم