27 Dec 2013

الريادي أحمد سليمان: الصورة الكبيرة

لو بصيت على الانشطة الطلابية فى الكلية هاتلاقيهم نوعين:

1. بيمثل شركة ما, زى ميكروسوف او جوجل او غيرها, و واخد تدريب و عارف هو بيعمل ايه و فى رسالة واضحة بيوصلها

2. نشاط طلابى مستقل او اسرة, بدأها طلبة هدفهم “يفيدوا” زملائهم. الفكرة هنا فى نوع “الافادة”.

هاتكلم عن الجانب العلمى من الافادة, و بتكلم على كليات الهندسة علشان انا فى كلية منهم و شايفهم, الأفادة بتتمثل فى محتوى علمى فى مجال الهندسة, او فى soft skills علشان تنفع الطلاب لما يتخرجوا و يشتغلوا, برضو فى حاجة فى مجال الهندسة, بس نسينا حاجة مهمة جدا, هى ان الطلاب مش داخلين كلية هندسة بمزاجهم, و مش بيدرسوا هندسة علشان هما بيحبوها و كانوا بيحلموا بيها. المجموع, او الاسم كمهندس, او الاهل, او النظام التعليمى كله هو اللى جابهم هندسة.

و بالرغم من كدا, كل اشكال الافادة اللى بيتقدم بتكون فى نفس المجال اللى هما مش مختارينه بمزاجهم و مش حابينه. الاقلية اللى حابة المجال محتاجة مساعدة, بس اللى مش حابينه و مش مختارينه بمزاجهم محتاجين مساعدة اكبر.

مش بقول ان الى بيتعمل غلط, بس بقول انه ناقصه حاجة, مش بقول ان المفروض نبطل نقدم اللى بنقدمه, بس المفروض نقدم معاه حاجات كمان, بقول ان ليه كل اللى بيتقدم بيبقى فى مجال الدراسة؟ ليه مفيش حد بيتكلم عن ال career paths المتاحة فى الدنيا فى مجالات غير الهندسة؟ ليه مفيش حد بيتكلم عن ازاى اتعلم و اشتغل فى ال social media marketing مثلا؟ او ال HR كمجال عمل مش بس HRD كمهارات محتاجنها علشان الشغل؟ او ال freelancing؟ او ريادة الاعمال؟ ليه محدش بيتكلم عن اهمية ال personality tests و ازاى ممكن تساعد الطلاب فى اختيار شغل مناسب لشخصيته و مهاراته و مواهبه؟

ليه كل اللى الناس بتتكلم فيه هو مكتبة كورسات كلها technical؟ كورسات لأى و كل حاجة technical ممكن تفكر فيها فى الدنيا؟ او sessions كلها technical؟ الحصول على المعلومات بقى اسهل حاجة, الفكرة ها نعمل ايه بالمعلومات دى؟ و ها نستخدمها ازاى علشان نوصل لأيه؟

كل اللى بقوله هو اننا بقينا بنتعامل كأن مفيش مجال او فرصة تانية غير المجال اللى بندرسه فى الكلية, و نسينا ان لسة فى فرصة تانية نتعلم و نشتغل حاجة بنحبها, بس محتاجين حد يفتح الباب و يخلى الناس تشوف الفرص دى

هو دا معنى “الافادة” من وجهة نظرى, نغير الفكرة و النموذج اللى بقى متعارف عليه من ان اى شغل بتعمله بيحضره ناس كتير جدا و بيستفيد منه عدد صغير جدا, اننا نفتح الابواب للناس و نخلي عندهم فضول انهم يعرفوا اكتر و هما ها يدوروا و يبحثوا علشان يعرفوا, مش اننا نجيب المعلومات اللى سهل يوصلولها بس هما مش شايفين انهم محتاجنها علشان كدا مش بيستفيدوا منها

أسمى احمد سليمان, فى سنة تانية هندسة الكترونية, جامعة المنوفية