05 Dec 2013

الريادي محمد طارق, الفرسان … حياة

 

“الفرسان .. حياة “

“الفرسان .. حياة ” دي أحلي جملة عن أحلي نشاط في الدنيا .. قبل ما أتكلم عن الفرسان, أحب أعرفكم بنفسي. أنا اسمي محمد طارق, الفرقة الرابعة كلية هندسة بترول و تعدين السويس قسم هندسة البترول, أول ما خلصت الثانوية العامة كان تفكيري أني أذاكر جامد عشان أجيب تقديرات بلا بلا بلا. طبعا جيبت تقدير كويس أول سنة بس برضو حاسس أني في مدرسة مش كلية ! يمكن عشان الكلية مش زي أي كلية ! أو عشان مكنتش مشترك في أنشطة تحسسني بالفرق ده.

الموضوع دا أختلف بعد ما أشتركت في أول نشاط ليا. بعدها بدأت أحس شوية أنني بعمل حاجة تانية جديدة و ممتعة. أتعلمت شوية و أستفدت أكيد بس برضو كانت الصورة اللي في دماغي للنشاط اللي نفسي فيه مش موجودة هنا. لحد ما في يوم واحد صاحبي ” الHead بتاعي ” كان عايزنا نروح إيفينت كده ناس أسمهم ” الفرسان ” عاملينه عشان مرضي السرطان, أهو منه شغل للنشاط اللي أحنا فيه و أهو منه عمل خير. الإيفنت دا كان يوم 29/7/2011 شفت ناس بجد روعة, أكتر حاجة شديتني ليهم الروح اللي بينهم و حبهم لبعض. بعدها بكام يوم لقيت صاحبي بيكلمني و بيقولي أنا أنضميت لل”فرسان” ! قولتلوا وأنا معاك. و روحت معاهم أول ميتنج و عملت أنترفيو و أتقبلت.

” الفرسان ” لقيته النشاط اللي كنت عايزه, كان الفرق بين ” الفرسان ” و الأنشطة التانية ” الروح و النية “. النية في أغلب الأنشطة أني أعمل موسم أحسن من اللي قبلي و من الأنشطة المناظرة ليا و الكل بحاول يرضي الHead بتاعه أو الرئيس. إنما في “الفرسان” النية بتبقي خالصة لله و عمل الخير بشكل تاني, الحب بين الناس و الهدف المطلوب أكبر من أنك تبقي عايز ترضي فرد, الكل بيرضي ربنا.

بدأت فترة الشغل مع ” الفرسان ” و حسيت أن ربنا بعتني المكان ده عشان هدف معين هدف جمعني بالناس دي. مع ” الفرسان “أتعلمت حاجات كتير. علمني “الفرسان”  قيمة العمل و معني التطوع و أخلاص النية ومعني روح الجماعه والصبر وتحمل المسئولية و التعاون .علمني ” الفرسان ” أنه لا يوجد مستحيل. علمني ” الفرسان ” التصرف في وقت الشدة و تحمل المسؤلية. علمني ” الفرسان ” ازاي نبقي واحد و قادريـن نعمل أي حاجة طول ما احنا مع بعض. علمنى ” الفرسان ” احترام الأخر و تقبله. علمني ” الفرسان ” أني دايمأ قادر. اتعلمت ان ” الفرسان ” مش نشاط, بل روح جوه كل واحد مننا. علَمنى ” الفرسان ” انَ قيمة الانسان فى العمل مش فى القول و انَ قيمة العمل فى الكيف مش فى الكم و انَ قيمة الكيف فى حب العمل و الايمان به …… علمني “الفرســان” معني الحيــــاة.

من المشاكل اللي بتواجهني مع أغلب الأنشطة الطلابية و منها ” الفرسان الأختلاط بالناس و الTeam Work عامة. للأسف انا من الناس اللي صعب تختلط بالناس بسهولة, كانت السبب في أنني مكملش في كذا نشاط لأني مش قادر أشتغل مع الناس بسهولة. مع ” الفرسان ” كان عندي نفس المشكلة في الأول بس بعد كده الناس هي اللي بدأت تسهل عليا كل حاجة, أخوات بجد و ساعدوني دايما. من المشاكل برضو كانت الكلية و السفر للسويس و أن الأيام اللي ببقي فاضي فيها مجرد يومين, أنا كنت بشوفهم قليلين عشان عندي أهتمامات كتير, كانت دي أكبر مشكلة بتقابلني مع الأنشطة عامة و ” الفرسان ” خاصة, قدرت أتغلب عليها بتحديد الأولويات و شوية تنظيم في الوقت و شوية تعب.

أتمني أكون مؤثر أكتر في أي مكان منتمي إليه و أتمني أنجح مع “الفرسان” في حلمنا, أن نوفر لجميع المحفزين – متحدي الإعاقة – حقهم في حياة عادلة حقهم في العلاج و الدعم النفسي والترفيهي والتعليمي و نوفرلهم احتياجاتهم. أن نوعي المجتمع بحقوق المحفزين و قيمتهم و دورهم في المجتمع و نساعد كل اللي يحتاجنا و نشوف بلدنا من أحسن البلاد. ممكن ميكونش “الفرسان” النشاط المثالي لناس كتير, بس هو بالنسبالي الحياة المثالية. ” الفرســـان .. حيــــــاة “