14 Dec 2013

كيف تنشر فكرتك – من وحي فعالية نهضة المحروسة

قامت جمعية نهضة المحروسة أحد أعرق الجمعيات المصرية العاملة علي دعم رواد الأعمال الإجتماعيين بتنظيم لقاء الأثنين الشهري بعنوان كيف تنشر فكرتك How to go viral في شهر يونيو الماضي. أستضافت الجمعية ثلاثة مشاريع من الأكثر تأثيراً وانتشاراً في الفترة السابقة وهم:

اساحبي – Asa7be Sarcasm Society

عندهم في المتوسط 2 مليون Reach علي صفحة الفيسبوك وأكتر من 4.2 مليون معجبين بنفس الصفحة. الفريق وضح ان الــ Reach مقياس أحسن من عدد الــ Likes بكتير بحيث ان ده العدد اللي المحتوي بيوصله في المتوسط. الفريق قال برضه انه بيوصل لحوالي 6.2 مليون مستخدم علي الفيسبوك في الأسبوع وحوالي 800 ألف Talk about اللي هي مجموع الــ (Share + Likes + Comment) لمحتويات الصفحة – ده من أصل 13.5 مليون مستخدم علي الفيسبوك وقتها, تقريباً بيوصلوا لنص مستخدمين الفيسبوك في مصر.

شادي صدقي أحد مؤسسي أساحبي بدأ بالرد علي مصدر الكلمة نفسها من سواقين الميكروباص في مصر بحيث انهم بيختصروا الكلمات بشكل بيعجب شباب الجيل الي حد ما, فريق المؤسسين لـ أساحبي أشتغل مع بعضه قبل كده في مشاريع شبيهة مثل هس السلعوة واعتبر شادي أن السخرية والمرح سهلة الإنتشار في المجتمع المصري بشكل كبير Fun is viral by nature فريق أساحبي كان بيدير صفحات بعدد كبير من المستخدمين الي حد أنه في اليوم الثاني من بداية الصفحة وصل عدد المعجبين الي اكثر من 15,000 من توصيل الصفحات ديه بالصفحة الجديدة.

شادي قال أن السر في البداية, مهما كانت بسيطة أو غير منظمة, البداية تعتبر في حد ذاتها نجاح- الفريق اعتمد علي الهواة, ومكنش فيه تخطيط كامل للموضوع هيمشي ازاي, فبيعتبر الموضوع توفيق من عند ربنا.

مشروع المريخ

المؤسسة مريم القويسني راحت مطعم واتفقت معاهم انه في يوم معين هتنظم Open Mic والناس استجابت يوميها, كانت بتكلمنا إيمان الشورباجي Event Organizer انضمت لهم في بداية السنة تقريباً علي مفهوم Project Yourself, الحاجة المميزة في مشروع المريخ أنه من أونلاين, لكن بيستخدم أساليب التواصل الإجتماعي للوصول للناس اللي بعد كده هتنضم للفعاليات اللي بيقوم بيها, لكن في الأساس الفعاليات هي القيمة الفعلية.

Cairo Runners

محمد سيف أحد أعضاء فريق Cairo Runners تحدث عن بدايات الفريق في نهاية سنة 2012 وكيف أن وجود حاجة حقيقية لدي شريحة معينة من الناس انهم يمارسوا رياضة الجري, وازاي كان الأنتشار الشفهي Word of Mouth أهم العناصر في انتشار الفكرة الي حد كبير, حيث يصل عدد المشاركين في فعاليات Cairo Runners الي حوالي 4000 مشارك, ده في نص 2013 تقريباً. المؤسس ابراهيم صفوت شاف انه لأسباب أمنية مش لازم يعلن عن الفعاليات في قنوات التواصل المألوفة فإعتمدوا علي قنوات التواصل الإجتماعي, ولعبت الصور الإحترافية اللي بياخدوها خلال الفعاليات دور كبير في الإنتشار

النصائح اللي ممكن نستخلصها من الفعالية , أيوه بقي البرشام زي ما أحمد سامح من فريق نهضة المحروسة بيسميها:

1- SIMPLICITY
اعتمد علي The single most basic need: علشان تنشر فكرة محتاجها تكون بسيطة جداً ومتصلة بالأشخاص بشكل مباشر وبحاجة ملحة عندهم, زي مابيقولوا بتوع الــ Sales دووس علي الجرح وركز علي كده.

2- CREDIBILITY
خد الموضوع اللي بتنفذوا وكلامك بجدية, محتاج تبني سمعة عند الناس, لو أنت فعلاً جاد في اللي بتقدمه الناس هتؤمن بيك وتاخد كلامك بجدية

3- AUTHENTICITY
نقطة مهمة جداً هو الحفاظ علي مصدر الإلهام, يعني يبقي كل الأفعال أو المحتوي اللي بتقدمه انت أو الفريق بتاعك هو اللي عمله, جو الــ Copycatting الرخيص عمره مبيوصل فكره للإنتشار, ركز علي الحاجة اللي أنتوا بتحبوها وعايزين فعلاً تنشورها من غير ما أي حاجة تشد انتباهكم.

4- CONSISTENCY
نقطة مهمة ان يكون في فترات زمنة معينة بيكون الناس بيتوقعوك فيها, يبقي معرف انك هتعمل ديه كل يوم أثنين أو هيكون في 3-4 بوست جديدة كل يوم علي الصفحة, التكرار بشكل ملائل بيخلي الناس تتعود عليك ويزيد انجذابها وتعلقها بالفكرة بدل ما تشوفها مرة وخلاص

النمو والمخاطر:

1- التحول الي كيان منظم

طبعاً التحول الي كيان منظم حاجة متعبة, وفي بعض الأحيان ممكن تبوظ الخميرة اللي خلت الفكرة تشتغل في الأول, بعض النقاط اللي شاركها المتحدثين كانت مثلاً بالنسبة بــ Cairo Runners صعوبة التواصل مع الناس العاديين اللي ملهومش في قنوات التواصل الإجتماعي Difficulties going mainstream, بالنسبة لأساحبي بما انهم أنشأوا شركة يديروا البراند من خلالها كان في تحدي في الـ Business Development ازاي يحول ده لبزنس يقدر يعتمد علي نفسه, ويمكن كلنا شفنا أول منتج ليهم في إعلان فودافوان الشهير, وبالتسبة لمشروع المريخ أعتبوا تحدي كبير هو الــ Operations الفعاليات انها تتم في كذا وقت في نفس الوقت بنفس الكفائة.

2- الشراكات

أحد الأمثلة علي الشراكات الناجحة مبين أساحبي ومستشفي 75375 كانت في حملة كانت عملاها المستشفي أون لاين وصحفة أساحبي قدرت تدعم الحمل ببوست علي الفيسبوك وصلهم للهدف من الحملة, نفس الموضوع مع مشروع المريخ اللي بينظم فعاليات مع جمعيات وجهات متخصصة, و Cairo Runner مستعد يعمل نفس الموضوع.

3- المنافسة أو الامركزية

جينا بقي عند نفطة مهمة جداً جداً, عارفين طبعاً ثقافة الــ Copycatting في مصر, أو ما حاجة تشتغل هوبااا, تلاقي ستين نفس الحاجة طالعة تاني وغلاباً ده بيأثر علي الجودة وخبرة الناس في الأعمال ديه وممكن يدمر الفكرة من الأساس, إزاي التلات أمثلة تعاملت مع الموضوع ده.

أول حاجة في أساحبي هما قرروا يمتلكوا البراند طالما هما اللي عملوه, لكن بقي فيه عشرات من الصفحات بنفس الأسم وبعضهم كان بينافس الصفحة الرئيسية, فريق أساحبي سجل العلامة التجارية علي طول واتكلم مع أصحاب الصفحات ديه وبعضهم كان علي استعداد يندمج وده فعلاً اللي حصل في معظم الحالات.

بالنسبة لــ Cairo Runners مكانش عندهم مشاريع توسعية ومعندهمش مشكلة في أي حد يعمل حاجة شبيهه في أي مكان تاني, لما ييجي الوقت أنهم يروحوا مكان تاني هيبقوا يفكروا في الموضوع.

مشروع المريخ برضه طلع له كذا مشروع المريخ تاني, كانت المشكلة بس انهم مايسموش الفعليات “مشروع المريخ” ويعملوا اللي هما عايزينوا, زائد ان فريق مشروع المريخ بيتيح المحتوي وأسلوب تنظيم الفعاليات Open Source أو بنسميه DIY Do It Yourself والتدريبات والمعلومات كلها تكون متاحة علي الموقع في هيئة Toolkit, زائد ان الفريق خطط لقافلة ازاي تعمل “مشروع المريخ” علشان يعرف ويدرب الناس ازاي تنظم فعاليات شبيهة. يعني مشروع المريخ معندوش مشكلة غير انك هو هتسمية مشروع المريخ تستخدم الــ Format بتاعهم زائد تتيح المحتوي لفريق “مشروع المريخ” الأصلي.

الأسلوب ده ممتاز جداً, وإحنا بنؤمن بيه جداً في إيجي برونور, اللي كانوا متبعينا في السنوات اللي فاتت كان هدفنا اننا نعمل Grassroots Movement for Entrepreneurs وكان الأسلوب اننا نعتمد نفس الأسلوب ده بإتاحة المحتوي كــ DIY ممكن تشوف وأنا بأتكلم في مقابلة مع قناة دبي 1 علي المبدأ ده من هنا. الأسلوب بتاع TEDx و مؤسسة زي ToastMasters باعتبره مثال ناجح ومثالي في الحالات اللي زي كده, المحافظة علي مؤسسة قوية بتدير الفعالية وتطورها واتاحة الفرصة لأي حد انه يستخدم المحتوي ده ويكبره, ويكبر تأثيره. الــ Copycatting في الحالة ديه هيدمر المؤسسة وهيشتت الحركة كلها علي بعضها وأي تأثير ممكن تقوم بيه.

 الفعالية كانت مفيدة جداً وأتاحت الفرصة للحضور انهم يستفيدوا من خبرات بعض, ممكن تعرف أكتر عن نهضة المحروسة من موقعهم هنا, وتنضم لصفحتهم علي الفيسبوك علشان تتابع الفعاليات الشبيهة, وبما إننا وقفنا عن تغطية الفعاليات اللي زي ديه من سنتين تقريباً, أهوه إحنا راجعين مع مدونة المجتمع علشان نغطي كل الفعاليات الشبيهة من أول السنة الجاية إن شاء الله.