05 Dec 2013

الريادي أحمد فتحي: تحقيق الحلم

كل واحد فينا ليه حلم نفسه يحققة. في ناس بيكون عندها أمل وإرادة إنها تحققة، وبتنجح، وناس لاء. الإنضمام للكلية الحربية كان حلمي من وانا عندي 5 سنين. ولما جاتلي الفرصة إني أحقق حلمي وأخلية حقيقة، حصلت بعض الأحداث والظروف الفجائية اللي تخليني اتخلي عن حلم حياتي ومأقدمش في الكلية الحربية. لكن بعد كدا ماستسلمتش لليأس وصنعت لنفسي حلم وهدف تاني في حياتي، فقررت التقديم لكلية الأداب قسم اللغة الإنجليزية، والحمد لله إتقبلت.

بعد مدخلت القسم اللي انا بأحبة، في السنة الأولي; إهتميت بالدراسة جداً ـ وبجانب كدا دخلت إتحاد الطلاب لحبي في بالمشاركة في الأنشطة الطلابية ومساعدة زملائي وأكون إجتماعي أكتر. في نفس السنة سمعت عن حاجة إسمها إناكتس ENACTUS لكن محبتش حتي أعرف دي إيه ولا إني أوصل لمعلومات أكتر عنها. في السنه التانية لقيت الموضوع دة بيظهر قدامي أكتر وزمايلي بينصحوني أنضم ليهم في إناكتس كفرالشيخ ولقيت إنهم بينفذوا مشاريع جميلة جداً وبتساعد الناس وإنهم غير هادفين للربح. قدمت وعملت إنترفيو Interview ويمكن دة كان أول إنترفيو أعملة في حياتي، علشان كدا كنت متوتر وبسبب كدا نسيت بعض إجابات للأسئلة اللي كنت بأتسألها. وإتقبلت الحمد لله.

إناكتس هي منظمة دولية غير هادفة للربح تعمل مع القادة في مجال الأعمال التجارية والتعليم العالي تحفذ طلاب الجامعات لإحداث فرق في مجتمعاتهم مع تطوير المهارات اللازمة ليصبحوا قادة الأعمال التجارية المسؤولة إجتماعيا. الطلاب المشاركين يشكلون فرق في حرم جامعتهم وتطبيق مفاهيم الأعمال لتطوير مشاريع التوعية التي من شأنها تحسين نوعية الحياة ومستوى المعيشة للناس المحتاجين.

في المرحلة دي أنا واجهت تحديين، الأول وهو اني اصنع لنفسي حلم تاني ونجحت في كدا ودلوقت انا بأكمل النجاح في الحلم دة، التاني وهو الإنترفيو، والحمد لله اتقبلت في الفريق ومازلنا نحقق أحلامنا وأحلام الأخرين. للأسف، في ناس كتير بتحدد لنفسها حلم واحد في الحياة ولو منجحوش في تحقيقة بيعتبروا نفسهم في طريق الفشل ويتملكهم اليأس، علي عكس البعض الأخر منهم اللي دايما بيبص للجانب المشرق. انا سألت نفسي سؤال واحد: لو انا كنت دخلت فعلا الكلية الحربية، كان هيكون وضعي إيه دلوقت. أنا قولت الحمد لله وكانت الإجابة علي السؤال هو إن ربنا دايما بيكون شايف لينا فين طريق الخير والنجاح “ممكن مكنتش اوصل لكدا في الكلية الحربية”. ساعتها مكنتش هأدخل القسم اللي بأحبة ولا هأقابل زمايلي واتعرف علي ناس مختلفة، مكنتش هأنضم لإتحاد الطلاب او إناكتس كفرالشيخ أو حتي كنت هأكتب الكلام دة دلوقت في ريادي.

هدفي من الكلام دة كلة إننا بنواجة وهنواجة تحديات كتيرة في الحياة وبتختلف حسب درجة النجاح والتعامل معاها. لو واجهك تحدي في يوم أو معرفتش (فشلت) تحقق حلم من أحلامك، اقف قدام المراية وإسأل نفسك سؤال واحد .. إنت مين؟ .. ولما تلاقي الإجابة هتلاقي نفسك وهتقوم تاني وتواجة العالم بنجاحك. دايماً خليك متفائل، حتي ربنا بيقول “تفائلوا بالخير تجدوة”. متبصش لورا ودايما بص قدام.متكونش الشخص اللي بيخاف من المستقبل وإصنع انت المستقبل بنفسك. بص دايماً للجانب المشرق وقول الحمد لله علي كل حال.

الإسم: أحمد فتحي عبد الحميد لبن

كلية الأداب، قسم اللغة الإنجليزية، جامعة كفرالشيخ