05 Dec 2013

الريادية لميس محمود, التطوع بإحتراف

 

“التطوع باحتراف” 

انا اسمى لميس محمود فى سنة رابعة كلية فنون تطبيقية قسمFashion  , يعنى انا ان شاء الله فى اخر السنة الدراسية دى هتخرج وهكون مصممة ازياء , بس انا من خمس سنين من وانا فى اعدادى كلية بشتغل فى نشاط طلابى فى كلية الهندسة جامعة القاهرة اسمه GATE , ومسكت فيه ادوار كتيرة منها Head Fund Raising , Head PR, Head HR ,  وكانت حياتى نصها تقريبا شغل فى  GATE. ودايما اهلى واصحابى كانوا بيقولولى “هو اية لازمة النشاط دة ؟؟” , ” هو اية علاقة دة بتخصصك انتى مصممة ازياء مالك بالعلاقات العامة ولا الموارد البشرية ؟؟ ” , ” انتى كدة بتضيعى وقتك اسمعى الكلام” , ….. وكلام من دة كتير,,

بس بعد كدة بطلوا يقولولى الكلام دة .. مع الوقت شافوا النشاط دة عمل فى حياتى اية .. مع كل سنة جديدة وانا بمسك دور جديد كنت بتعلم فيه حاجة مختلفة عن السنة اللى قبلها , لما لاحظوا ازاى طريقة تفكيرى اتغيرت , لما لاحظوا ازاى طريقة كلامى وتحليلى للمواضيع اتغيرت , لما شافوا انى من وانا لسة بدرس جالى عروض شغل , وانى حاليا بقى معايا خبرة تؤهلنى انى اشتغل فى اى مكان انا عايزاه بطلوا يقولولى كدة .

انا اتعلمت فى GATE حاجات كتير , بس انا مش هدفى انى احكيلكم انا اتعلمت فيها اية, انا بكتبلكم لكم الكلام دة عشان عايزة اشارككم قيمة كبيرة اوى اتعلمتها وهى ” التطوع باحتراف” او “professional Volunteerism”.

   احنا شوفنا مشاكل كتيرة اوى فى GATE مثلا سنة مفيش فلوس نشتغل بيها , وسنة الثورة تيجى وتغيرلك كل الخطط بتاعتك , وسنة الشركات فيها مشاكل نتيجة للاحداث اللى بتحصل ومترضاش تتعاون معاك,,,, بس الحمد لله كنا دايما بنعدى كل دة والسبب الاساسى لاستمرارنا رغم كل المشاكل دى بعد توفيق ربنا طبعا هو تمسكنا بالقيم بتاعتنا.

فى GATE فيه خمس قيم اساسية كل ممبر فيها عارفهم كويس اوى وبنقولهم كل ميتنج ورغم مرور خمس سنين على وجودى فى GATE وناس تيجى وناس تمشى بس القيم دى ثابتة , كأنها الحاجة اللى بتجمعنا وتحافظ على استمراريتنا.

القيم دى بأختصار هى:

1)    النية: احنا شغالين فى نشاط تطوعى؟؟ هدفنا اية ؟؟ والنية بتختلف من سنة للتانية على حسب كل فريق بييجى بس دايما كانت هدفها رضا ربنا .. يعنى السنادى النية “ وَأَنْ لَيْسَ لِلْإِنْسَانِ إِلَّا مَا سَعَى * وَأَنَّ سَعْيَهُ سَوْفَ يُرَى” والسنة اللى فاتت كانت ” وَعَجِلْتُ إِلَيْكَ رَبِّ لِتَرْضَى” والسنة اللى قبلها “ قُلْ إِنَّ صَلاَتِي وَنُسُكِي وَمَحْيَايَ وَمَمَاتِي لِلّهِ رَبِّ الْعَالَمِينَ“.

2)    الاستمرارية : استمرارية النشاط واستمرارية الفكرة نفسها مهما واجهتها من مشاكل.

3)    التعلم الذاتى : محدش بيعلمك حاجة والمعلومات مش بتجيلك جاهزة , انت اللى بتعلم نفسك بنفسك احنا بس بنوجهك.

4)    الابتكار: لازم تكون مبتكر ومختلف عشان تقدر تثبت وجودك وتضيف حاجة جديدة للناس.

5)    واخيرا والقيمة اللى حابة اتكلم باستفاضة فيها هى ” التطوع باحتراف”

يعنى اية اصلا “متطوع محترف” ؟؟؟

–         حضرتك شغال فى نشاط طلابى صح ؟؟

–         اه صح

–         يعنى مش بتاخد منه فلوس ويمكن بتدفع فيه كمان صح ؟؟

–         اه صح

–         يعنى متطوع لله وللوطن صح ؟؟

–         قولت ايوة صح وبعدين يعنى

–         بس هل دة معناه انك تشتغل وقت ما انت عايز وتريح وقت ما انت عايز ؟؟

–         ممممممممم

المتطوع المحترف فى GATE  كأنه مدير فى شركة , دة يمكن المدير بيكون بيشتغل عشان الفلوس ومش حابب شغله , بس المتطوع بتاعنا غير انه مدير دة كمان بيستمتع جدا بشغله وبينفذ الشغل المطلوب منه فى وقته وبأحسن طريقة مش اى كلام ووقت ما يكون فاضى لأنه التزم قدام ربنا وقدامنا انه احق بالمكان دة وانه هيقدر يفيد فيه.

وقت المشاكل والازمات تلاقيه اول واحد يجرى ويسيب اللى وراه واللى قدامه وييجى عشان يحل الازمة , بس مش معنى كدة انه يقصر فى دراسته ..لأ دة كمان مهتم بدراسته لانه ببساطة محترف فى كل حاجة.

المتطوع المحترف هو قائد حتى لو كان عضو عادى مش قائد فريق, هو قائد فى كل مهمة بيكون مسئول عنها, هو اللى بيحرك الناس عشان يخلصوا المهمة بتاعتهم, هو اللى بيفكر فى اى مشكلة تواجهه بنفسه ويفضل وراها لحد ما يحلها لانها المهمة بتاعته اللى بيها بيساهم فى تحقيق هدف GATE.

هل دة معناه ان كل اعضاء الفريق متطوعين محترفين؟؟

لأ طبعا فيه متطوعين عاديين وبيشتغلوا برضه وليهم دور مهم بس مش بيستفيدوا زى المتطوع المحترف .

التطوع باحتراف هو الاحسان.

انت متطوع فى المكان دة وعايز رضا ربنا عايز تعلم الناس وتفيد المجتمع يبقى لازم لما تيجى تعمل حاجة لربنا تعملها باحسان.

كل متطوع فى اى نشاط يقعد مع نفسه ويفكر كويس ويسأل نفسه هل انا متطوع محترف ؟؟ هل انا بعمل شغلى باحسان ؟؟

اللى هيتذوق طعم التطوع باحتراف ويحس بقيمة اللى بيعمله هيتعلم انه يعمل كل حاجة فى حياته باحسان.

اللهم ارزقنا الاحسان JJ

لميس محمود

 11/8/2013